كان لي صديق أسس شركة سنة 2005 ، وكان يزورني في شركتي وأنا أزوره في شركته ، وقتها كانت عبارة عن 5 أفراد تقريباً وكنت بساعده في تعيين بعض الوظائف نظراً إن خبرته بالبيزنس كانت ضعيفة .
و كان فاتح الشركة لتنفيذ مشروع مؤقت وفعلاً قدرت أساعده بشكل كويس وعينت معظم أفراد الشركة أو فريق العمل
أذكر أنه كان من ضمن الفريق شاب كان عنده تقريباً 22 سنة وكان يحب العمل في التسويق ، وفعلاً تم تعيينه في شركة صديقي وكان شاب متحمس ولديه القدرة على التعلم .
لأن صديقي معندوش خبرة في البيزنس ، ولم يكن لديه نيه إنه يكمل أطلق علي كل فريق العمل لقب مدير ، بمعني إن الموظف الوحيد في الفريق اللي عليه مهام التسويق قاله إنت مدير التسويق ، والموظف الوحيد في فريق العمل الموكل ليه مهام البرمجة قاله إنت مدير البرمجيات ..وهكذا.
طبعاً صديقي كان بيوزع الألقاب من باب التشجيع وإن إيه يعني ما نفرح الشباب وبعدين هيا الألقاب دي حكر علي حد ولا عليها ضرايب مثلا ؟؟.
لكن المشكله مش في صاحب الشركة اللي فعلاً مش فارقة معاه ولكن في فريق العمل اللي ممكن بعضهم في وقت معين يصدق التسمية ويثبت عنده إنه مدير ويمسك في الكلمة وده اللي حصل مع الشاب اللي اشتغل في التسويق وبعد ما صديقي أغلق شركته كما هو مخطط لقيت الشاب ده بيتصل بيا وبيقوللي إنه عايز ينضم لفريق العمل عندنا في الشركة ….
طبعاً أنا رحبت جداً وحددت معاه موعد تاني يوم واجتمعت معاه للاتفاق علي التفاصيل وبعد محادثة مني عن طبيعة دورة في التسويق لقيته بيستغرب جدا !!!- سألته إيه المشكله بالظبط في كلامي أو في العرض اللي أنا قدمتهوله قاللي أنا جاي أشتغل مدير تسويق مش فرد عادي ….
حاولت أفهمه إن فريق التسويق عندنا في الشركة كبير وبيديره شخص معاه ماجستير في إدارة الأعمال اللي أنا ساعتها مكنتش حصلت عليها وإنه هيستفيد جداً لما يشتغل معاه وياخد من علمه وخبرته فلقيته يرفض بشده وحسم وإنه طالما وصل للقب مدير مش هينفع (ينزل) تاني لمسوق عادي .
وطبعا ً لم يلتحق بالوظيفة الموجودة واللي كانت فرصة ليه وقعد يدور علي شركة تقبل بيه كمدير وهو عنده سنه أو سنتين خبرة
المهم أنا عايز أتكلم باختصار شديد في نقط محددة :
لازم تفهم إن المدير ده مش لفظ لكن مسئولية وعلم وإنك لو حصل بالصدفة إنك بقيت مدير فانت كده بتحرق مراحل لأن الرجوع عنها بيبقي صعب وفي نفس الوقت لو انت أخدتها في شركة نتيجة ظروف معينه ممكن بعد كده ما تلاقيش شركة بنفس الشكل تقبل بيكثانياً انت عندك وقت لازم تتعلم فيه علشان لما تبقي مدير تطبق اللي اتعلمته وتعلمه للي تحت منك فلو الوقت ده إنت ضيعته أو نطيته هتبقي مدير فاشل لا انت عارف حاجه علشان تطبقها ولا فريقك بيستفيد منك بعلم أو خبرة علشان كده قابلت ولا زلت ناس كتير بترفض الترقية مش هربا من المسئولية ولكن لإحساسها إنها لسه محتاجة تتعلم علشان لما تاخد الخطوة تبقي أدهاثالثاً لازم تقيس نفسك بالسوق مش بشركتك ….
بمعني إنك لازم تشوف المدير في السوق بتاعك أو في الصناعة بتاعتك بيبقي خبرته كام سنه ؟ علشان دايما لازم تفكر إنك ممكن تسيب شركتك الحالية بكره (علي سبيل المثال) فلازم تقيس نفسك في السوق ومتقبلش اللقب وخلاصرابعاً الشركات بره لما بتبقي عندها مشكلة في مدير ساب الشركة مثلاً وفيه حد موجود ينفع يبقي مكانه لكن خبرته أقل إخترعوا حاجه اسمها Acting as Manager يعني انت مش مدير لكن هتشتغل سنة أو اتنين كأنك مدير لحد ما تبقي مناسب لمسئوليات المنصب وبعد كده تاخد الترقية أفضل ما أرقيك وألاقيك مش مناسب فاضطر استغني عنك لأني مش هجيب مدير جديد علي مدير سابق وده تأمين للموظف وللشركة معاًأخيراً محدش يستعجل وكل حاجه بأوانها و لازم يبقي عندنا تخطيط واضح للمسار الوظيفي Career Path ولو أنا أخدت كل لقب متأخر سنة أو اتنين أحسن من إني أخده بدري وأفشل ويتحرق مساري الوظيفي أو تبقي علامة سوداء في مسيرتي تأخرني علي المدي الطويل وتضرني اكتر ما تنفعني وربنا يوفق كل المجتهدين اللي بيعرفوا يخططوا صح