حلو إن إحنا لما نلاقي حد بيقع ، نساعده إنه يقف ويكمل
يحارب ويعافر من الأول ، ياخد نفس ويكمل
وده حلو جدآ ومطلوب أوي …
بس لما حد بيقع وهو بيلعب ..
قبل مايخلوه يكمل ماتش ..
بيكشفوا عليه الأول ، بيعملوا ليه شوية إسعافات أوليه …
وباعدين بيقولوا كمل يابطل لو هما شايفين فعلا إنه هيقدر يكمل لعب….
وده للأسف حاجة إحنا بننسي نعملها مع اللي بيقعوا نفسيآ ..
بنطلب منهم المعافرة قبل مانطلب منهم ياخدو النفس الأول ونعملهم شوية الإسعافات النفسية دي …
إللي وقف مكانه فجأة وإيده سابت ، ده واحد متكسر من جواه ، متفتفت حتت صغيرة أوي
أقعد معاه ع الأرض ، لملمه من جواه الأول ، جمع إللي إنكسر منه ، طيب خاطره وروحه ،
إديله هدنة ومساحة وراحة ، ولما تحس إنه رجع لطبيعته إبدأ شجعه علي الطريق من تاني ومتسبهوش ….
إللي إتسمر مكانه فجأة بعد فترة زمنية قصيرة كانت أو طويله مش محتاج منك تقوله يلا قوم كمل ، لأن ساعتها هو مش بيبقي سامعك أد مابيبقي صعبان عليه التوهه إللي بيبقي فيها ، هو محتاج يسمع منك إنه مخسرش الجوله علي الفاضي ، محتاج يحس إنه فعلا تعب عشان يوصل بس لسة الوقت مجاش للوصول ، محتاج تساعده إنه ياخد هدنة ونفس عميق ، عشان لما يقدر يقوم يعرف يكمل ويبقي مستعد ، عشان لو قام في عز تعبه وضعفه المميت ده مع أول خبطة وجع هيقع ومش هيقوم تاني ، لأنه هيبقي متهالك جدآ من جواه وأقل حاجة هتحصل هتاكل من روحه وهتجيبه من تاني للأرض من غير مايمشي مسافة صغيرة حتي …..