فكرة القرار إننا ندخل علاقة حب إحتمال تكون فكرة سهلة ، لكن فكرة إننا نكمل فيه وإحنا حاسين براحة ، وإحنا حاسين إننا لما بنمد إيدينا بحاجة بترجعلنا بحاجة أكبر دي فكرة صعبة شوية ..
كلنا بنعرف نحب ، بنبقي حاسين إننا عندنا قدرة علي التعبير بالحب بشكل قوي جدآ ، كل حد بيحس إنه بيعمل اللي عليه وزيادة ..
لكن ياتري حد فينا فكر اللي بيعمله ده الطرف التاني بيحبه ولا لأ .. بيحرك مشاعره ولا لأ ، حاسة ولا لأ ، الطرف التاني ممكن يكون محتاج حاجة تانيه ولا لأ …
معظم علاقات كتير شفتها بعيني كانت بتفشل ، ولازم أسمع كلمه ” أنا اللي عملت إللي عليا وزيادة ”
إنت فعلا ممكن تكون عملت إللي عليك وزيادة من وجهة نظرك ، من إحساسك إنت ، لكن من وجهة نظر الطرف التاني إنت مش بتعمل حاجة ..
ممكن تكون بتهتم بالعام وهو بيحب التفاصيل …
ممكن تكون بتهتم بالماديات وهو بيحب المعنويات ..
ممكن تكون بتهتم بحاجة وهو بيهتم بحاجة تانيه خالص …
ممكن تكون بتبذل مجهود جامد جدآ وبتصرف هدايا وحاجات والطرف التاني محتاج منك وقت وبس ، وقت تسمعه ، وقت تطبطب عليه …
فعشان كدة لازم عشان أي علاقة تكمل إن الطرفين يقربو وجهة نظرهم لبعض ، يفهمو بعض ،
كل واحد يشوف التاني بيحب إيه ويعمله ، يهتم بيه زي ماهو عايز ، يحبه بالشكل اللي هو حابة …
إعرف الحب بيعنيله إيه وإيه الطريقة إللي ينفع تقدمله الحب ده بيها …
أعرف هو عايز إيه ، مش أنا بعرف أعمل إيه …
تكوين علاقة حب كاملة وناجحة مش بالسهولة اللي ممكن تتخيلها ، ده عايزة وقت ومجهود وتركيز في التفاصيل عشان نوصل في الأخر …
ممكن حد يقول ” أنا كدة هاجي علي نفسي عشان أرضيك ”
لا هي مش كدة ، مش مجاملة هي ، ماينفعش نبني علاقة علي مجاملة …
لأن ده أسوأ حاجة ممكن تعملها في نفسك وفي الطرف اللي معاك ..
عشان كدة متحاولش تغير طرف عشان يتوافق معااااااك ..
إختار اللي شبهك ، وإللي هيتوافق مع الطاقة اللي هتقدر تبذلها … واللي متوافق جدآ مع إحساسك