مع الوقت هنتغير| خواطر ياسمين حاتم
فلان الفلاني مينفعش تصاحبه، كنت ارد عليهم بسرعة مع الوقت هتغير، ومع الوقت أنا إللي تغيرت وبقيت زيه بالظبط…
مش مقتنعه أن اتجوز الشخص ده، كنت اسمعهم يقولولي بعد الجواز هيتغير مع الوقت، وتجوزت ومتغيرش…
وحاجات كتير أوي، الوقت مغيرش فيها أي حاجة..
هو من امتى الوقت بيغير!؟
الوقت بيغير الملامح، بيخلينا أكبر، بيبان علينا السن، بس من جوانا بنفضل زي ما إحنا، أصل الوقت مهمته الوحيدة أنه يمُر، بموافقتك من غير موافقتك بيمُر!!
مين بقا اللي دخله في تغيرك أنت وهو !؟
اللي معندوش قابلية أنه يتغير، الوقت عمره ما يغيره
لازم من جوانا نفهم عيوبنا، ونشوف السبب فيها ونحلها، مينفعش نفضل عمرنا كله متجاهلين عيوبنا وعيوب إللي حوالينا، علشان بس مش قادرين نستغنى عنهم، أو خايفين منلاقيش حد غيرهم !!!
لأن وهم التغيير لم بيبان على حقيقتة بعد فترة، بيكون في ناس كتير خسرت
أوعى تقبل على نفسك أنها تعيش في وهم، أسمع نصيحة اللي حواليك، وحاول تفهم أن دلوقتي تقدر تصلح كل حاجه كانت غلط من البداية، علشان بعدين ممكن يكون الوقت عدى وفات أنك تاخد قرار أنك تختار نفسك، وتفوقها من الوهم، وفي النهاية
مفيش حاجه بتتغير مع الوقت، غير تجاعيد وشنا
