وجه الإعلامى أحمد شوبير نصيحة لعصام الحضرى مدرب حراس مرمى منتخب مصر قبل مواجهة الكاميرون بكأس الأمم الأفريقية الخميس المقبل، قائلا “سمعت إن محمد أبو جبل ممكن يشارك فى مباراة الكاميرون لو إصابته إجهاد وشارك فى تمرينة واحدة قبل الماتش يبقى ممكن يشارك إنما لو شد يبقى صعب يشارك فى المباراة، وهقولكم هو ليه خرج فى مباراة منتخب المغرب”.
وأضاف شوبير، في برنامجه الإذاعى عبر أون سبورت إف إم، “وقت المباراة بيكون هناك شد عصبى كبير أوى وزيادة عن اللزوم ووقتها تحس إن الإصابة كبيرة لكن بعد المباراة بتكون بسيطة، وأتمنى مدرب الحراس ميزودش التدريبات فى الفترة دى”.
وأستكمل “الحراس مش محتاجين تدريبات قوية فى الفترة دى مش مستاهلة هما عندهم الأساس والوقت صعب، وطول عمرى كنت باخد تدريبات غلط مع احترامى لكل الحراس اللى دربونى كنا كلنا بنجتهد، لكن اكتشفت مع مرور الزمن إننا كنا ماشيين بالبركة ومكنش حد بيذاكر ولا يعرف زى دلوقتى”.
وتابع شوبير “يا جماعة مستحيل يحصل تلاعب فى مسحات منتخب مصر وأنا كمان عكس مصر كلها فى موضوع الحكم أنا مش قلقان منه إحنا دولة كبيرة والكل يعملنا ألف حساب”.
وأستطرد قائلاً “والحكم السنغالى بتاع مباراة المغرب اللى الكل هاجمه أنا كنت شايفه مش متربص لإنه لو متربص كان حسب ركلة الجزاء لوحده لأنها ركلة جزاء صحيحة والفار هو اللى استدعاه وطلب منه يحسبها عشان مفيش تربص هي مجرد أخطاء عادية”.
وأضاف شوبير “نجوم منتخب مصر لو مركزين زى مباراة المغرب هنكسب الكاميرون وهنعدى لو مين الحكم”.
وأكمل شوبير “شوفت كورة رمضان صبحى فى نهاية مباراة منتخب المغرب معرفش إزاى مجبهاش جول، رمضان لازم يطور مهارة التسديد عنده معرفش إزاى لحد دلوقتى لم ينمى هذه المهاراة عنده”.
وتابع شوبير “أنا شوفت فيديو الخناقة اللى بيقولوا عليه أكثر من مرة وهو الحقيقة مش موضح أى حاجة وعاجبنى التصريحات اللى خرجت من المغرب وقالوا فيها لن نشكو المنتخب المصرى ولو حصل عقوبة تبقى بعيدة عنا، كل الاحترام للإشقاء الغاليين على قلوبنا”.
