معرفتش أنسى!| خواطر ياسمين حاتم
“لو سمحت ممكن تخلصلي الورق ده مستعجلة أوي!!”
كانت دايمًا مستعجلة، عايزه تسابق الزمن والوقت وطموحها ونجاحها وكل حياتها ..
شايفة دايمًا إن مفيش وقت ويا نلحق يا منلحقش!
حبيتها من أول كلمة، نظرة عنيها، هدؤها وهي متعصبة، طريقتها وهي بتتكلم، تركيزها وهي بتسمع اللي قدمها، حتى تعاطفها مع أي حد كان صادق.
في الحقيقة كانت مريحة أوي
مع أول مره إتكلمت معاها حكيت كل حاجة اللي ينفع يتحكي واللي مينفعش..
من جوايا كنت بسكت نفسي،” أهدى شويه يمكن تفتكر أنك مجنون وراغي، ” بس معرفتش أسكت!!
كنت عارف إن بعيد عن تفكيرها، وإنها عايزه حد يجري أسرع منها ويشدها ويقويها، مش يأخرها ويحبطها
وأنا كان كل طموحي وظيفة ثابتة أعيش منها وخلاص، ممكن تقولوا في بالكم أن أنا إخترت الطريق السهل، وسبتها تمشي، وكان ممكن تتغير عشانها!!
لكن فعلآ أنا حاولت بس المشكلة إن كنت من جوايا خلصت كل حاجة حلوة عندي، قبلتها في الوقت الغلط،
ياااه لو كنت شفتها من خمس سنين بس،
كان وقتها قلبي سليم من جوا مش مكسور من علاقة خرجت منها خسران…
سبتها تمشي خفت أطفي شغفها، وأمحي ضحكتها إللي كلها تفاؤل ونجاح وقوة …
هتستنى أي من شخص مش عارف يساعد نفسه، وهي عنيده ومبتقبلش بالفشل،
حاليآ أنا براقبها من بعيد وفخور بيها جدًا
“حبيتها ودي الحقيقة “
بس مقدرتش أنسى شعور قديم سيطر عليا، وبقيت بيه بهتان، وصعب تلون لون باهت.
“الحب مش كفايه علشان نتقبل بعض !”
