هدايا أونطه | يوميات فتحية شرباش
لاقيت سفيان ابن سعيد اخويا داخل عليا بابتسامته الجميلة ، ومعاه حصان صغير ، وبيقولي أنا جبت لك الحصان ده يا توحه عشان بحبك اوى .
ضحكت وحضنته وفضلت أبوس فيه لإنه افتكر عمته ، وفجأة صرخ وقال هموت منك لإني صغير وانتي مسكاني جامد اوى .
ماهو يا حبيبى عنده خمس سنيين .
سبته من أيدي ، وقلت له اصلك واحشني قوي.
قالي وانتي كمان وحشاني ، عشان كده ، جبت لك مفاجئة معايا غير الحصان.
قلت له : ايه هيا يا نور عيني.
بص لابوه وقاله هات العلبه يا بابا ، وراح سايبها جنبي .
بصيت للعلبة ، شكلها شيك أوي ، قلت في نفسي اكيد فيها شوكولاته غالية ، وفتحتها لاقيت فيها مفاجأة صدمتني ، بدل الشوكولاته ( قطعة ملبن _ فراولايه _ موزاية _ تفاحة _ جوافايه _ بلحايه … ) ،.
بصت له بضحك وقلت الله هدية جميلة اوى يا سوفه ، ما أنا لازم اعوده على العطاء .
رد وقال : أنتي مبسوطة بالهدية يا توحة .
قلت له : أوي يا حبيبى وفجأة دخلت أمي وورتها هدية سوفة .
قالت لي : خلي بالك سكرك عالي اليومين دول .
رد سفيان : أنت عيانه يا توحه .
قلت له : أيوه يا حبيبي راح واخد العلبة مني وقال لأمه خديها يا حفوصة ، علشان توحه عيانه ، كُليها انتي وبابا .
وشويه دخلت وئام بنت اختي اللي عندها ٧ سنيين ، ووراها سفيان الهدايا بتاعته ، شافتها ونزلت جرى عند أمها ، وبعد عشر دقايق تقريبا طلعت وفي ايدها علبة حلاوة المولد .
وقالت لي خدي الهدية دي مش إحنا ولادك .
بصراحه فرحت اوى بالكلمة دي وإن ولاد اخواتي بالحنية دي .
طبعا لما شوفت المنظر ده ، اتصلت زي الهابلة بميدو اخوها.
وقلت له إطلعلي بسرعة ، وإديته ١٠٠ جنية يروح السوبر ماركت ويعمل لهم تشكيلة من المصاصة والكونو والشوكولاته … ، في شنطتين زي بعض وخرج ميدو وأنا قاعدة أبوس فيهم واشكرهم ، لحد ما جه ميدو ، خدوا الحاجات ، وكلوا جزء منها وسابوا الباقي.
وفجأة لقيت سفيان بيقولي ، أنا مش فرحتك بالحصان.
رديت أوي يا سوفة.
قال : الحصان ده صغير عليكي ، وكمان أنت مش صغيرة علشان تلعبي بيه ، أنتي أكبر من بابا ، وخده مني ، وأنا ماسكة نفسي من الضحك.
المشكلة ان وئام خدت هي كمان علبة الحلاوة .
وقالت دي ماما شرياها لينا علشان مولد النبي ، وقلت افرحك بها شوية وخدوا العيال الهدايا مني .
وأنا مذهوله انهم ضحكوا عليا ، وطلعت هابلة لما جبت لهم حاجات ب ١٠٠ جنية ، فعلا اللي يمشي ورا العيال ويصدقهم ، يبقى عيل زيهم .
